Туган ягым – гөлләр иле

Бүген бездә кунакта Җәүһәрия әби! 80 яшь тулуга карамастан, бик җитез, җор телле, бик уңган һәм бик ачык булып чыкты ул! Без — егетләргә тәмле кыстыбый пешерү серләре белән бүлеште — җәһәт кенә камыр басты, бәрәңге төйде, безне дә кыстыбый пешерергә өйрәтте. Җәүһәрия әби рецептын Сезгә дә тәкъдим итәбез.
Бәрәңге боламыгын һәркем әзерли белә, әмма Җәүһәрия әби бәрәңгегә тәмле булсын өчен 1-2 баш суганны пешергәндә үк салып җибәрә, пешкән суганны бәрәңге белән бергә төя. Шулай иткәндә боламык тәмлерәк килеп чыга! Камырны бары тик сөткә генә баса, 1 литр җылымса сөткә тәменчә тоз, сыек май, 100-150 грамм каймак, 1 йомырка сыта. Камырны җәеп, эчлекне сала, бәрәңге эчлектән чыкмасын өчен, камырның чит-читләрен чеметеп ала һәм сыек майда кыздыра.
Пешереп карагыз! Бик тәмле була!
Кыстыбый

Тәмле ризык, милли ризыкны һәркем ярата. Ә ул ризыкны ир-егетләр әзерләсә, бөтенләй дә тәмле була инде. «Ир-ат кулы тигән аш-суга фәрештәләр канатын куя», — диде безгә тәмле өчпочмак пешерү серләрен өйрәтергә килгән Флюра апа. Килешми мөкин түгел, Флюра апа белән җиде дистә өчпочмак әзерләдек: эчлек -бәрәңге, ит, суган турадык, камыр бастык… аннан укытучыларыбыз белән бергәләп үләнле чәй эчтек. Өчпочмаклар кетердәп, авызда эреп торды. Тәмле ризык пешерергә, татарча сөйләшергә, уенда катнашырга теләсәң, безнең «Татар чәе»нә син дә кушыл!

Кадерле укучылар, укытучылар! Сезне Халыклар бердәмлеге көне белән котлыйбыз! Бергә дус, тату яшәргә чакырабыз.
Һәрвакыт бердәм булыйк, бергә булыйк, ярдәмләшеп яшик!
4 ноябрь — Халыклар бердәмлеге көне. Бу бәйрәмнең тарихы ерак гасырларга барып тоташа. Ул тынычлык, иминлек, бәйсезлек өчен бердәмлек символын чагылдыра. Әйе, уртак көч булып туплансак, авыр чакта бер-беребезгә ярдәм кулы сузсак, җәмгыятебездәге вакыйгаларга битарафлык күрсәтмәсәк, төрле дин һәм милләт халкына, аларның гореф-гадәтләренә хөрмәт белән карасак, без — көчле халык. Иң мөһиме — кыйблабыз ачык, туры булсын. Аңлашып яшәсәк кенә тормышыбыз рухи һәм икътисади яктан алга китәр.

Ниһаять, «Татар чәе» проектын быелгы уку елында да башлап җибәрәбез. Әгәр милли ризыкларыбызны пешерергә өйрәнәсең һәм алар турында кызыклы мәгълүматлар беләсең килсә, уен, Аулак өйләр яратсаң, безгә кушыл! Бергәләп әзерлик, бергәләп уйный, бергәләп туган телебездә сөйләшик, бергәләп чәй эчик!
Өстәлләрдә самавыры,
Сөтле чәе янында.
Татар чәйсез, чәй татарсыз
Яши алмый бер көн дә.

Кадерле, яраткан һәм бик хөрмәт иткән укытучыларыбыз!
Сезне ихластан Укытучылар көне белән тәбриклибез. Сәламәтлек, бәхет, уңышлар, сабырлык телибез. Сез безгә бик кирәк!
Килгән чакта башка авырлык
Җитми калса, көч я сабырлык.
Сиздермичә ярдәм иткәнсез
Сез иң гүзәл кеше икәнсез!